Ole Torp, Eli Nessa, Hilmar Mjelde, Janne Stigen Drangsholt og Jacob Lee Tom diskuterer den dramatiske valkampen i USA.
Trump har blitt skoten, Biden har trekt seg og Harris kan bli USAs første kvinnelege president. Dette er valet kor alt kan skje og mykje står på spel. Vi har invitert eit toppa USA-panel til Universitetsbiblioteket i Stavanger.
Mangeårig journalist og utanriksentusiast Ole Torp har over tjue par cowboyboots og eit lidenskapeleg forhold til USA. Han har budd i dette landet i to omganger, først som utanrikskorrespondent for Dagbladet frå 1987-1990, og for NRK i åra 1998-2002. Torp held seg framleis oppdatert på amerikansk kultur og politikk, og kjem med fullt magasin i spørsmåls-colten når han tar plass i programleiarstolen.
På fest med Trump
Eli Nessa er ein av få nordmenn som har vore på fest med Donald Trump. Året var 1991 då 17 år gamle Eli frå Madla drog til New York for å delta i modellkonkurransen «Look of the Year». Trump var vertskap og sat i dommarpanelet som vurderte utsjånaden til modellane, som kunne vere så unge som 14 år. På programmet sto også fest på Trumps luksusyacht. Det vart ein nedtur for Nessa som skildra festen slik til NRK: «Du såg eldre menn som sikla etter unge jenter».
Nessa har lagt modellkarrieren på hylla og jobbar no som universitetslærar i journalistikk ved UiS. Ho kjem for å fortelje om då ho møtte Trump, og dele sine tankar om kvifor ein så kontroversiell mann har blitt så populær blant amerikanarane.
Ettertrakta USA-ekspert
Telefonen til Hilmar Mjelde står ikkje stille når det er valkamp i USA. Han er ein av våre mest ettertrakta USA-ekspertar og professor i statsvitskap ved Høgskulen på Vestlandet. Mjelde har mellom anna forska på Trump-rørsla og den udemokratiske utviklinga til The Grand Old Party – det republikanske parti. Vi spør: Toler det amerikanske demokratiet stresstesten som Donald Trump utgjer? Og er amerikanarane klar for ein kvinneleg president?
Kjendiskultur
Amerikansk politikk og kjendiskultur går hand i hand. Då modell og influensar Amber Rose sa at ho ikkje lenger trur på løgnene mediene fortel om Trump og erklærte si fulle støtte til han som presidentkandidat på republikanarane sitt landsmøte, kasta ho verdifull glans over Trump. Harris har derimot alliert seg med pop-artisten Charli xcx som proklamerte at “kamala is brat”, noko gen z likte godt.
For dei som høyrer til generasjonane som kom før, er det ikkje greitt å henge med. Heldigvis kjem professor i litteraturvitskap, Janne Stigen Drangsholt, som også forstår seg på kjendiskultur. Ho vil freiste rydde opp i alt som skjedde denne brat-sommaren, og forklare kva det er med amerikanarar og kjendisar.
Rapport frå heimlandet
Jacob Lee Tom er fødd og oppvaksen i Wisconsin. Han flytta til Stavanger for å studere i 2017 og held på med ein PhD i historie ved UiS. I sommar har han vore heime og treft vennar og familie og lova å gje oss rapport frå heimlandet. Er amerikanarane så splitta som nyheitene skal ha det til? Og veit han kven han skal røyste på 5. november?
Minikonsert og bar
Etter panelsamtalen blir det minikonsert med A band – regionens beste og mest hardtarbeidande country-trio. Dei spelar den triste, men trøystande amerikanske musikken, den du treng når verda blir riven i fillebitar.
Tappetårnet er samarbeidspartnar og stiller med bar frå klokka 18.30. Samtalen startar 19.00. Konserten startar 20.30. Tappetårnet serverer fram til klokka 22.00.
