Forskarar frå UiS har utvikla analyseverktøy for økonomisk vekst

– Dette er eit verktøy som viser moglegheiter for økonomisk vekst, forklarer Silje Haus-Reve.

Ho er førsteamanuensis ved avdeling for innovasjon, leiarskap og marknadsføring på Handelshøgskolen ved UiS. Ho har, saman med professor Tom Brökel frå same avdeling, og professor i innovasjon og prorektor for innovasjon og samfunn på UiS, Rune Dahl Fitjar, utvikla analyseverktøyet DiveOpp og selskapet DiveOpp AS.

Dei skal sjå på spørsmål som: Kva er det som gjer at nokre regionar klarer omstilling og vekst, mens andre ikkje klarer det? Har forsking noko å bidra med i framtidas regionsutvikling? Kva slags kunnskap er det i så fall avgjerdsmyndigheiter, konsern, konsulentar, klynger, industri og bankar treng for å satse i ein region?

– Me har i første omgang fokusert på å utvikle verktøyet for regionar. Her ser verktøyet nærmare på kva slags omstillingsmoglegheiter som er til stades i næringslivet i ein region - altså lågt hengande frukt - som kan sikre ei omstilling som regionen har større forutsetninger for å lykkast i, seier Haus-Reve.

Dei har sett at det ikkje alltid er dei dominerande næringane som har dei største sjansane for vekst.

– Mindre kompetansemiljø eller næringar som ikkje nødvendigvis er så dominerande kan ha ein kompetanse som er relativt unik og dermed også vere smarte val, seier Haus-Reve.

Såg at det var eit stort behov

Det er gjennom eiga forsking, innsikt i fagfeltet og i dialog med avgjerdstakarar at dette blei til. For då fekk dei sjå at det var eit behov for eit verktøy som gir kunnskapsbaserte avgjerdsgrunnlag og forskingsbaserte analysar over utviklingsmoglegheiter.

– Me har nok vore litt oppgitt over at det er mykje synsing der ute og at det er fleire store avgjerder som blir tatt basert på relativt lite faktagrunnlag. Det er her vårt verktøy og analyser kan kome til nytte.

Verktøyet gir eit forskingsbasert kunnskapsgrunnlag for avgjerdstakarar, men ikkje noko fasitsvar.

– Det er ikkje sikkert vårt verktøy gir svaret dei ønsker, men innsikten gir òg innblikk i kva som manglar og som gjer at ein kan jobbe meir proaktivt mot dette for å sikre ei meir robust utvikling. Me ønsker å bidra med å sette i gong ein dialog og ein prosess som baserer seg på eit solid faktagrunnlag.

Så langt har fokusert vore mest på regionar, men dei har sett at dei også kan utvikle dette vidare til andre aktørar, slik som bedrifter og bankar.

Nå har dei i over eitt år jobba med ei klynge som jobbar aktivt med omstilling som er lokalisert på Austlandet.

– Dette har vore veldig spennande, og me skal presentere resultata på Østfoldkonferansen i september, seier Haus-Reve som sjølv er ein av konferansens innleiarar.