Fram mot 2030 er grøn omstilling ei sentral satsing ved UiS. Ei arbeidsgruppe skal forme og verkeleggjere satsinga saman med ein koordinator for grøn omstilling.
![](https://www.uis.no/sites/default/files/inline-images/vyIO9CqX3JGEtVpfjL2Xj2Fa314STcHHei3g8X8LLjblUIfzzn.jpeg)
Satsinga på grøn omstilling står sentralt i UiS sin Strategi fram mot 2030. Det er både ei tverrgåande satsing som påverkar alle fag- og verksemdområde, og ei fagleg temasatsing som peiker på område kor Universitetet i Stavanger (UiS) ønsker å profilere seg innan forsking, utdanning, innovasjon og samfunnskontakt.
– Grøn omstilling inneberer endringar i alt frå teknologi via politikk og økonomi til den enkelte si åtferd. Det betyr at vi må jobbe godt på tvers og integrere både naturvitskapleg, samfunnsvitskapleg og humanistisk kunnskap i forskinga og utdanninga vår, og i arbeidet vårt med innovasjon og samfunnskontakt, forklarer Rune Dahl Fitjar, prorektor for innovasjon og samfunn.
Fitjar har ansvaret for å følgje opp satsinga. Vårsemesteret 2022 vart nytta til å tilsette ein koordinator og etablere ei tverrfagleg arbeidsgruppe. Ein strategi og handlingsplan er no på plass.
Styrke samarbeidet mellom fagmiljøa
Arbeidsgruppa skal bidra til at universitetet jobbar målretta mot å ta meir samfunnsansvar i det grøne skiftet. Gruppa skal også bidra til omstilling av eiga drift og campus i tillegg til å skape ei kulturendring og haldningsendring for studentane og dei tilsette.
Den tverrvitskaplege arbeidsgruppa for grøn omstilling er: Anders Müller, Homam Somehsaraei, Jens Fisker, Jonas Gjersø og Ruth Pincinato.
– Eg er glad for at vi har fått på plass ei arbeidsgruppe med spisskompetanse på grøn omstilling frå fire fakultet. Desse aktørane skal blant anna bidra til å styrke samarbeidet mellom fagmiljøa innafor grøn omstilling, påpeiker Fitjar.
Arbeidsgruppa skal jobbe tett med koordinator for grøn omstilling, Rebecca Briedis, som blei tilsett våren 2022. Briedis har ein master i miljøteknologi frå Storbritannia og har i fleire år jobba med å utvikle strategiar knytt til berekraftig omstilling og sirkulær økonomi.
Satsingsområdet «Grøn omstilling» blir i det daglege drifta av arbeidsgruppa saman med koordinator, som igjen rapporterer til ei styringsgruppe.
Styringsgruppa:Rune Dahl Fitjar, Troels Jacobsen, Birgitte Bauer-Nilsen, Bjørgulf Eidesen, Cathrine Gjertsen, Finn Arne Jørgensen, Frode Alvheim, Mette Fossan, Oluf Langhelle, Øystein Arild, Ragnar Tveterås, Henriette Thune
Tekst: Karen Anne Okstad