– Det eg likte best med UiS og Handelshøgskolen er graden av internasjonalisering

Andrei Mikhailov og Cleber da Costa Webber er begge doktorgradsstudentar frå Brasil, og har vore på universitetet frå august til november. Mikhailov kjem frå Unisinos Business School i Porto Alegre, og da Costa Webber frå University of Universidade do Vale do Rio dos Sinos.

Dei har vore aktivt engasjert i Senter for innovasjonsforsking sine aktivitetar, sosiale arrangement og presentasjonar under fleire doktorgrads- og innovasjonsseminar. Formålet med opphaldet har vore å arbeide som gjesteforskarar med forsking på universitets- og næringsrelasjonar og innovasjonsevner som ein del av doktorgradsavhandlinga saman med professor Marte Cecilie Wilhelmsen Solheim. I tillegg skulle dei sende inn ei forskingsoppgåve til ein internasjonal akademisk journal.

Verdifull læring

Mikhailov har delt nokre tankar om opphaldet sitt i Stavanger, og seier at han høge forventningar til både byen, universitetet og Handelshøgskolen ved UiS, men at alt innfridde.

– Det eg likte best med UiS og Handelshøgskolen er graden av internasjonalisering. Dei aller fleste av doktorgradsstudentane kom frå andre stadar enn Noreg, og det var interessant å høyre på deiras erfaringar i andre land og universitet. For meg i siste fase som doktorgradsstudent er det veldig verdifullt å lære om det, for det får meg til å forstå meir av den akademiske arbeidsmarknaden, jobbmoglegheiter og også nokre kulturelle aspekt ved forskjellige land. Eg fekk meg også gode vener her, og me dro mykje ut. Blant anna til lokale restaurantar, og til stadar som Arkeologisk Museum og Jernaldergården, seier Mikhailov.

Han fekk også oppnådd mykje akademisk, blant anna bidrog han til mange publikasjonar. I tillegg prøver han å godkjenne eit nytt prosjekt for finansiering der ein forskar frå UiS skal delta. Elles var ein aktivitet som heiter «Brown Bag-seminars» eit hyggeleg minne:

– Det involverer ulike typar aktivitetar blant doktorgradsstudentane frå Handelshøgskolen ved UiS, som presentasjonar av artiklar, eller til og med uformelle aktivitetar som guida turisttur eller ein middag, seier han.

Rikande utveksling

Professor Marte Solheim ved Handelshøgskolen ved UiS som òg er leiar for Senter for innovasjonsforsking seier det har vore ei stor glede å ha Andrei Mikhailov og Cleber da Costa Webber som gjesteforskarar dette haustsemesteret.

– Denne utvekslinga av mangfaldig kunnskap, idear og erfaringar er rikande. Ikkje berre for dei, men også for heile forskingsmiljøet.