Anerkjent pris til forskar ved Handelshøgskolen ved UiS

– Det kjennest heilt fantastisk! Det er ei stor ære å få denne prisen, seier Elham Ghazimatin som er «Assistant Professor» på Handelshøgskolen ved UiS.

Ho har nyleg blitt kåra som vinnaren av Robert Lusch Early Career Research Award.

Robert Lusch var ein amerikansk professor i marknadsføring, og denne prisen har som mål å anerkjenne nokon som har publisert ein artikkel tidleg i sin karriere i eit AMA Journal. Artikkelen skal vere banebrytande og introdusere nye teoriar for å betre kunne forstå forbrukarar, marknaden og marknadsføringshandlingar.

– Eg er ekstremt interessert i styring av prosjekt/mellombelse organisasjonar, og eg håper at denne prisen vil oppmuntre til meir forsking på temaet, seier Ghazimatin.

Takknemleg for anerkjenninga

Det er American Marketing Associaton (AMA) som deler ut prisen, og her er nokre ord frå jurykomiteen:

Me mottok mange fremragande nominasjonar, men din skilde seg ut ikkje berre for det nye i forskinga og hennes konseptuelle rammeverk, men også for potensialet til å gje betydelege bidrag til vår forståing av ein svært understudert, men utbredt organisasjonsform – den mellombelse organisasjonen. Valkomiteen syntest arbeidet var ekstremt imponerande og at det oppmuntrar til framtidig arbeid og har interessante leiarmessige implikasjonar. Professor Lusch ville sjølv vore stolt av denne forskingsstraumen.

Ghazimatin seier sjølv at ho synest Professor Lusch har gitt enorme bidrag til feltet, og at det er ei stor ære å få ein pris i hans namn.

– Å få høyre at han sjølv ville vore stolt over forskinga mi betyr verkeleg alt. Det er også fantastisk og smigrande å få så utmerka støtte frå mange seniorforskarar på området. Eg er djupt takknemleg til kvar av dei for å anerkjenne verdien av forskinga mi, og for å nominere meg til denne prestisjetunge prisen.

Utdelinga av prisen vil skje på AMA sin konferanse i Nashville i februar.