– Det er eit stort behov for revisorar, så det å velje ei ettertrakta utdanning var motiverande

Karen Høyland Ollestad har ein bachelor i økonomi og leiing frå BI i Oslo. Mastergraden bestemte ho seg for å ta i rekneskap og revisjon (MRR) på Handelshøgskolen ved UiS.

Kvifor valde du å ta ein master i rekneskap og revisjon?

Eg valde denne masteren sidan eg var mest glad i dei typiske rekneskapsfaga som blant anna økonomistyring og finansrekneskap. Eg syntest også det var kjekt at ein har så mange moglegheiter ved å velje denne masteren. I tillegg er det eit stort behov for revisorar, så det å velje ei ettertrakta utdanning var også motiverande.

Kvifor valde du UiS og Handelshøgskolen?

Eg valde UiS sidan ein kjem tettare i kontakt med det lokale næringslivet. UiS er ein kjekk plass å vere student når ein tek i bruk moglegheitene som finst. Det er mange ulike studentforeiningar som ein kan engasjere seg i.

Korleis ser ein typisk studiekvardag ut på rekneskap og revisjon?

Me har forelesingar rundt tre dagar i veka; ei forelesing per fag og resten går til sjølvstudie. Ein står derfor fritt til å lese som ein sjølv ønsker, og kan planlegge veka etter eige behov. Det er også mogleg å jobbe på sida, og vere med på ulike studentarrangement.

Har du nokre spesielle minne frå studietida di til nå?

Me hadde ei veldig kjekk fadderveke der det for første gong var faddarar som også gjekk MRR. Me skal derfor også vere faddarar til hausten slik at dei som byrjar då får same oppleving som oss, så det er berre å glede seg!

Kvifor burde ein studere rekneskap og revisjon, og kven burde ta denne utdanninga?

Eg trur mange ikkje er klar over moglegheitene ein har med master i rekneskap og revisjon. Det er ein super inngangsbillett til fleire store og små firma. Det er ei kjekk masterutdanning kor ein sjølv kan bestemme korleis ein vil legge opp kvardagen. Dei som er glad i dei typiske finansrekneskap-faga bør verkeleg vurdere å ta denne masteren.

Har du nokre råd til framtidige studentar?

Gje MRR eit forsøk! Eg kan verkeleg anbefale det på det sterkaste, og det er berre å ta kontakt med meg om nokon skulle ha spørsmål om studiet.

Les også: Marie Larsen Gellein studerte master i rekneskap og revisjon og jobbar som revisor i KPMG